看了電影「真三國無雙」，我懷著極度興奮的心情在FaceBook 留下感想。但結果被Facebook 刪掉了。唯有在自己的Blog 保存。（因為真的太憤怒了，所以用廣東話來寫）
最近終於放假可以休息一下，看了電影真三國無雙這套大作。
之前看過一堆擺明收免費飛睇戲寫鱔稿的影評然後明明係合拍片但又叫人支持香港電影的影評，再睇過其他影評，大概都心中有數。
結果就係周顯揚夫婦的金漆招牌，果然係牢不可破。同埋香港KOL真係可以為張免費戲飛出賣良心。
電影真三國無雙，是根據日本根據中国根據歷史改編的小說改編的游戲改編的電影。
既然俾錢問日本人買版權，就梗係想原著的Fans入場，如果唔係自己拍套《周顯揚三國志》算數。
改編電影最大的問題，就係亂改。你可以跟Game，可以跟三國演義，甚至跟史實都得，但佢一口氣得罪晒三國迷同Game 迷。
因為真係怒過怒鞭督郵，所以劇透（其實差唔多成套電影講左出黎）唔想睇請回避。
1. 張角每一代都只係放火/放龍卷/落石，做乜事玩Biohazard？點解劉備用弓箭？跟住張角撤退之後直接話黃巾賊潰敗，就連張角死左都冇交代。直接比三兄弟隊冧仲好過。
2. 黎耀祥把死人聲真係好似太監。黎耀祥57歲，曹操當時先三十幾歲，演他的王凱38歲，真係完全唔Match。
3. 怒鞭郵督，錯殺呂伯奢演義都有，都還好，曹操含淚殺完呂伯奢，又話一生只欠佢一個，明明應該係想描寫佢都有人性一面。但陳宮要求曹操葬呂伯奢曹操又唔肯？成套戲裡面，文戲拍得最好已經係曹操PTSD發作疑神疑鬼以為呂伯奢一家要殺佢果段。
4. 劉嘉玲個原創角色鑄劍堡堡主係想做乜？？佢目的係想解釋無雙能量，同埋之後打呂布「以血餵兵」的設定，但完全無必要兼兀突。隻Game都無講到點解D無雙武將咁好打啦。有冇人話過隻game唔真實？曹操仲要攞既係Lv1的「將劍」？大家都知曹操果把叫「倚天劍」啦，你諗住埋伏筆俾佢進化？？
5. 呂布響隻Game入面係可以一個打一千個，但唔係一下剷平成個森林囉。仲有套戲都講「人中呂布馬中赤兔」，隻馬整番D紅色上去唔得架咩？
6. 曹操返去老家，其實曹操先係戲既主角，曹家D人例如夏侯兄弟呢？孫策零對白都有遊戲造型啦。唔係逐個角色計版權咁搞笑掛？
7. 劉備介紹孫堅果陣，點解介紹埋仲係細路既孫權？而孫策有遊戲造型但完全無提起？？
8. 無名小卒劉備走入去講兩句就令到大家都肯接受佢？演義佢係跟公孫瓚黎，但孔伷、韓馥都有出場，但「公孫瓚」三個字響套戲完全無出現過。
9. 十八路諸侯，先入洛陽果個係大都督？？家下楚漢相爭先入關中為王呀？
10. 華雄斬人頭好似打Golf咁打去聯盟陣營做乜勁？
11. 關羽：「面對比自己弱既人，我會讓三招」，關二哥稱號係乜？武聖呀！你幾時見過咁臭串的關二哥？周大導開戲拜關二哥唔驚架咩？？？
12. 關羽打卒仔，打呂布都用火屬性攻擊，但打華雄反而招招到肉，最後成功斬華雄，係因為華雄擺左個「駱駝式瑜伽」姿勢硬直兩秒俾關羽有機可乘。（我都係事後Google先知呢個姿勢係叫「駱駝式瑜伽」）
13. 十八路諸侯伐董卓，之後袁紹開「第十九路」俾劉備三兄弟，得三個人開第十九路？？
14. 點解曹操要無啦啦要同從來無交流過的劉備練劍？？？
15. 之後袁紹好佛心咁仲要送埋兵馬俾劉備，D士兵齊叫「我願意」，我結婚都無咁講啦。係咪杜編劇結婚嗰陣嬲佢老公冇講到呀？
16. 貂蟬早左好多出場，唔緊要，唔駛佢打都無問題，但俾佢著番隻Game 件衫都得掛？仲有可唔可以解釋一下點解佢要係響冰天雪地著件超薄大露胸的衫帶埋把刀走去⋯⋯投湖自盡？方圓百里一個人，一隻馬都無，一個弱質女子點樣走過去？
17. 最後到重頭戲，三英戰呂布，整乜鬼兵陣呀？有打過隻Game都知係一個武將係咁「討ち取ったり」之嘛。
18. 隻game嘅呂布係追求武道巔峰嘅人。唔係變態殺手呀！點解古天樂要整啲淫邪笑容？而家去拍〈殺人犯〉續集咩？呀導演真係咁念念不忘呢套成名之作？
19. 呂布果把根本唔係方天畫戟，係雷神之錘！直接用戟放電去電人，之後仲要徒手放電遠攻？
20. 兵器竟然有「吸血變強」的設定。三兄弟唔夠打，走去以血餵兵，但點解關二哥要爆衫界心口但劉備同張飛就玩界手？隻Game裡面的關二哥雖然都唔係好大隻，但都唔好搵個咁瘦既關二哥爆衫丫？
21. 大家都知三英戰呂布最後結果係打和啦Super。周顯揚夫婦的電影一定要係估你唔到。今次估你唔到既位係三英戰呂布之後，就直接跳到幾年後，然後擬似煮酒論英雄？？？？？？雖然背景並非跟原著。董卓呢？呂布呢？
22. 曹操叫劉備靠近，似講秘密果陣，我幾驚佢講「我又諗起你老婆啦」。（好彩無），但戲裡面，原著，同埋Game裡面劉備都係真心扶漢喎，曹操憑乜話佢講大話面不改容呢？
23. 最後係「三國的故事從此揭開序幕」。「三國演義」已經開左一段，「三國鼎立」仲有排，呢個位係乜序幕呢？
成套戲都有做得好的地方，就係林雪。真係好有霸氣。
同埋另外一個造型神還原係袁紹。但呂良偉氣場太勁，無做到袁紹的廢。
仲有張建聲做張飛雖然全場都有出現，但戲份極少，但也做得不錯。
整體大方向其實無咩問題。只不過係細節太多離譜嘅位。
同埋唔知係咪因為合拍片所以要俾中國演員發揮。但關二哥著墨太多，其實到虎牢關之前關羽既作用都只係得個打字，佢真正發揮性格係降曹開始。最應該着墨嘅劉備就反而冇乜點講。
係，周導演係演藝學院First On畢業，我完全唔識電影。冇乜資格批評。但係，戲係拍比觀眾睇，唔係用嚟自hi。
三國係一個好蝦人改編嘅題材。因為全世界都知個故事結局係乜。一係就跟原著/史實。好似吳宇森到赤壁，甚至完全亂嚟好似日本仔嗰套反轉三國誌。甚至超時空要愛都得。
改編作品，係要吸引原著嘅fans，而唔係辣慶fans。啊導演你唔好連隻game嘅吸引力係乜都唔知就走去改編先得㗎 ？隻game吸引嘅地方唔係故事，而係打卒仔好爽。套戲又唔係冇做到嘅，但真係好段路。基本上你睇預告已經好夠。
我識人係做電影，所以我真係有諗過係咪應該咁火滾講出嚟。但我真係好火滾。
相關
私人日語課程
．在日語學校學過日文，但很少機會練習會話？
．自學過日文，但只是學文法，無法活用？
．日語班進度太慢，想學快些？
．想考日能試，但沒有人解釋為什麼我的答案不正確？
．身處外國，需要一個會廣東話的人去教授？
如果你有以上煩惱，我可以幫到你。
首兩個月內如有不滿，可以半額退回學費。
