語文係基礎，呢點唔洗拗。而要學好語文，無捷徑，要靠大量咁睇 –––– 睇書、睇戲、睇劇、睇漫畫 –––– 別無他法。唔係睇文法書、唔係做語法練習啊，係睇真實一本本嘅書啊！我從來無見過一個人，係因為做語法練習，而學得好英文。一個都無。

曾經有個阿媽咁同我講：「我個仔啊，佢啲文言文好差。」我呸！錯撚曬！你個仔唔係文言文差，而係，佢根本就從來都無睇過文言文！

你可能會話：「唔係喎，文言文好深架喎，咩《論語》啊、《岳陽樓記》啊 –––– 商旅不行，檣傾楫摧 –––– 咁深，點會識睇啊？」

屌……你一開波，乜柒都唔識，就走去打大佬，你梗係唔夠打啦！悟空咁勁，一開波都要打下大魚、打下恐龍、打下天津飯、打下大魔王，之後再打埋比達、菲利、斯路、最後先夠布歐打啦。你老闆，你一開始就打布歐，你實覺得難打㗎！

英文，道理一樣，十個學生，九個都覺得文憑試篇閱讀理解深。梗係深啦，讀咗十幾年英文，你本半小說都未睇過，你梗係乜都睇唔明啦！

幾乎個個學生都覺得個試深，咁即係反映咗啲咩啊各位？反映咗教育差。俾個學生你教，教足十幾年，佢都仲係乜都唔識，唔係學校問題係邊個問題？學校根本就無畀過機會學生去學習。用十幾年時間教英文考試，都唔柒寧願用半年時間教英文，屌！

學習，係要一步一步建立上去，由淺到深。循序漸進。無捷徑。一個正常嘅香港人，由出世到考文憑試，大約有17年時間。當中超過一半時間，花咗係學校讀書。唔好講課後嘅時間，只講課內嘅時間。如果學校由細到大都培養、甚至陪住個學生一齊睇書、一齊睇小說。讀到17歲考文憑試，我唔明仲有咩人會唔合格！

可惜，現實係點呀各位？呢十幾年，每日都做無謂嘅功課，操練無謂嘅試題。時間花咗，苦功下左，不過能力毫無寸進。

順帶一提，今日嘅學生，連卡通片都無時間睇，仲邊會有時間睇書？今日嘅學校教育，將學生嘅童年娛樂都剝削埋，同地獄毫無分別。你以為你個仔返學係學讀書識字，其實你個仔係落咗地獄。唔好以為放咗學就等於出獄，放咗學之後仲有大把功課等佢做！每日都做無謂嘅功課，操練無謂嘅試題。時間花咗，苦功下左，不過能力毫無寸進。

請你唔好忘記一個重要嘅事實：而家嘅教育方法 –––– 溫默書、做練習、操試卷、貼試題、返補習 –––– 佢所製造出嚟嘅結果，係會令到絕大部份學生嘅英文都唔合格。考文憑試嘅，基本上有一半人唔合格。合格嘅，又唔見得高分。高分嘅，又唔見得個個可以「咯咯聲」咁同到洋人溝通。

我唔知你原本有無諗過「而家嘅教育方法係錯」嘅呢個問題。我亦都唔知老師、家長知唔知有呢個問題。不過我想同你哋分析下，佢哋知又點，唔知又點：

如果佢哋明知有問題、明知無用，佢哋都要迫學生做咁多無謂嘅操練，操足十幾年，佢哋就係賤人、佢哋就係虐兒！

如果佢哋知道有問題，不過唔敢反抗，咁佢哋就係懦夫！

如果佢哋唔知，咁佢哋就係無知！

如果佢哋唔覺得有問題，而且覺得有用，咁佢哋就唔止無知咁小事，佢哋仲係弱智！

講到呢度，你可能會話，佢哋都唔想，係個教育制度迫佢哋咁做：小學考 TSA、中學考文憑試。佢哋無得唔以考試為本。

OK，再講多次，以考試為本嘅學習，係無用架。學生要學嘅，係英文，唔係英文考試啊！你英文好，考試前做少少練習，熟習一下個考試模式，考試自然都會好，係咁簡單。你英文唔好，你再操練都只會係徒勞。

學生英文差，唔係因為佢哋唔夠勤力。啱啱相反，而係因為佢哋花咗十幾年嘅時間，去做啲對學習毫無幫助嘅事：背生字、溫默書、操試卷、學語法、做練習。

講完一樣，我而家講另外一個重點：

我想講，成件事最錯嘅，唔係家長、唔係老師，佢哋只係幫兇。最錯嘅，係制訂教育嘅嗰班仆街。佢哋製造萬惡嘅TSA之類嘅考試出嚟。 搞到學生永無寧日。如果無咁多公開考試嘅壓力，根本求學嘅十幾年入面，人人都可以正正經經咁讀書，無人需要走後門。而家唔係，讀書嘅呢十幾年，又要應付原本嘅課程、又要應付公開考試。根本就無時間可以同時做好兩件事！學得嘢嚟，搞唔掂考試；搞得掂考試嚟，又無時間學嘢！屌！

點解學生寧願走後門 ––––「貼」題目、學考試技巧，都唔寧願踏踏實實咁讀書？因為現實唔容許佢哋咁做。個前門已經俾個教育制度封曬，你唔走後門唔得！

重新制訂教育政策，解封返個前門。人人正正常常咁讀書。香港就會有福。

喺英國，無人睇雞精書，因為根本就無得買。所有同學一齊睇原著。用 上 堂 嘅 時 間 一 齊 睇！用一個學期時間去睇。逐版逐頁咁睇，之後同老師一齊討論本深奧嘅哲學書講乜。睇完一個學期，之後去考公開試。呢本書如果係香港教，最多教你兩日，而人哋係用一個學期去教。成日都話英國教育好啲，點好法？就係咁簡單：踏踏實實咁學，唔求速成即食。學習冇捷徑，冇得一步登天，一定要循序漸進。呢個道理，香港人好難明白，因為你哋已經俾人洗曬腦 –––– 睇吓雞精書、上下維基百科、考試過到關就以為自己識晒。

再講，慢慢讀係香港無可能做到。因為個考試本身畸形，問題出得有咁刁鑽得咁刁鑽，又唔畀時間你好好學習。個前門已經俾個教育制度封曬，你唔走後門唔得！

點解我哋會直播同大家睇故仔書啊？因為我哋想教好你英文……至少想教識你「學好要點做」嘅方法 –––– 睇書。睇書係學好語文嘅不二法門。我哋能力範圍入面，可以做到嘅事，就只有陪你睇書。

學習無捷徑；學習係要慢慢嚟，循序漸進。不過，如果你學得其法的話，學習無你想象中咁難、考試無你想象中咁深。你英文學極都學唔識，係因為你返花咗十幾年時間學英文語法，從來都無學過英文。

如果你仲讀緊書，或者，如果你想學返好啲英文。唔該，拎起本書睇。唔撚好一睇就睇成尺厚嘅嗰啲小說 –––– 唔撚好一打就打布歐！搵本兒童版嘅小說睇、搵本翻譯版嘅漫畫睇，已經好足夠。日子有功，英文自然好。別無他法。你畀再多嘅錢，請再好嘅老師、搵再好嘅學校教你，都唔及你自己拎起本書睇咁有用。

係咁多。